A po ndihet e rrezikuar siguria e Gjermanisë?

Alarm në Gjermani: Dron me eksploziv në aeroportin e Leipzigut – ishte vërtet sulm ndaj Gjermanisë?
Autoritetet gjermane janë në gjendje alarmi dhe në gatishmëri të lartë pas zbulimit të një droni me eksploziv në aeroportin Leipzig/Halle.

Ministri i Brendshëm, Alexander Dobrindt, e cilësoi incidentin si një “nivel krejtësisht të ri kërcënimi” dhe paralajmëroi se mund të bëhet fjalë për një sulm hibrid të planifikuar nga aktorë profesionistë.

Ai tha se fakti që një dron i armatosur me eksploziv është gjetur brenda territorit të një aeroporti përbën një skenar të ri dhe shumë shqetësues për sigurinë kombëtare. Hetimet po zhvillohen me intensitet, por nuk përjashtohet mundësia që pas këtij veprimi të qëndrojnë edhe fuqi të huaja shtetërore.

“Ky nuk duket të jetë veprim amatorësh. Nuk dua të spekuloj, por nuk mund të përjashtohet që pas këtij incidenti të qëndrojnë aktorë të huaj”, deklaroi Dobrindt.

Ky është rasti i parë i njohur në Gjermani ku një dron është gjetur i ngarkuar me eksploziv. Informacionet paraprake tregojnë se bëhet fjalë për eksploziv me karakteristika ushtarake. Dobrindt tha se kërcënimi nga dronët ishte vlerësuar prej javësh si i lartë dhe se autoritetet kishin rritur nivelin e alarmit për shkak të zhvillimeve të fundit.

Fluturimet në aeroportin Leipzig/Halle u ndërprenë përkohësisht gjatë natës, Punonjësit e sigurisë zbuluan më pas dronin me pajisje shpërthyese, ndërsa specialistët e Policisë Federale arritën të çaktivizonin ndezësin para se të ndodhte një shpërthim.

Sipas hetimeve të publikuara nga NDR, WDR dhe Süddeutsche Zeitung, aeroporti mund të ketë shmangur për pak një katastrofë të madhe. Dokumentet hetimore sugjerojnë se ndezësi i paketës së bashkangjitur te droni ishte këputur aksidentalisht, gjë që pengoi shpërthimin. Burime të sigurisë thonë se droni ndodhej pranë një avioni transportues ukrainas.

Vetëm pak orë pas zbulimit të dronit, ndodhi edhe një incident tjetër. Një avion mallrash u përplas me një objekt ende të paidentifikuar gjatë fluturimit dhe u detyrua të ulej në Hanover me dëmtime të lehta.

Hetuesit po shqyrtojnë nëse dy ngjarjet kanë lidhje me njëra-tjetrën.

Aeroporti Leipzig/Halle konsiderohet një nyje e rëndësishme logjistike për transportin e materialeve ushtarake në kuadër të mbështetjes për Ukrainën. Që nga fillimi i luftës së Rusisë kundër Ukrainës, në Gjermani janë raportuar gjithnjë e më shpesh raste të vëzhgimit të infrastrukturës kritike, objekteve ushtarake dhe aktiviteteve të dyshimta me dronë.

Ngjarja ka shkaktuar shqetësim të madh në qarqet politike dhe të sigurisë në Gjermani, ndërsa autoritetet po punojnë për të zbardhur origjinën e dronit dhe për të përcaktuar nëse vendi po përballet me një formë të re kërcënimi ndaj infrastrukturës së tij kritike.