I ftuar sot në Top Channel, në emisionin Shqipëria Live, për videot skandalet që prej një jave po qarkullojnë në rrjetet sociale:

Pastor, Paulin Vilajeti:

Si njeri i besimit, këtë ngjarje nuk e shoh thjesht si një lajm dite. E shoh si një pasqyrë të krizës sonë morale.
Po ju lë tre mendime për të reflektuar sot:
E para, mëkati krijon cikle.
Bibla thotë se pasojat shkojnë deri në brezin e tretë dhe të katërt. Kjo nuk është fat. Janë cikle. Sjelljet e gabuara që nuk ndalen, kthehen në model që shkatërron familjen dhe pastaj shoqërinë. Nëse nuk e thyejmë sot, do ta paguajnë fëmijët tanë nesër.
E dyta, Zoti ekspozon fenomenin, por mbron personin.
Te Gjoni 8, gruaja e kapur në tradhti bashkëshortore. A e keni vënë re? Për 2000 vjet, Perëndia nuk e ka zbuluar kurrë emrin e saj. Ai ekspozoi fenomenin, plagën e shoqërisë, por ruajti personin.
Ne sot po bëjmë të kundërtën. Po harrojmë fenomenin dhe po shkatërrojmë personin. Me emër, me mbiemër dhe me pasoja të përjetshme.
Në atë histori, Jezusi u ul përtokë dhe shkroi në dhe. Ajo ishte e ulur nga turpi, Ai u ul në nivelin e saj për t’ia mbuluar turpin.
Nëse Zoti u ul për të mbuluar një turp, kush jemi ne që rrimë në këmbë me gurë në duar, gati për të shkatërruar jetë?
E treta, paralajmërimi më i rëndë është për ata që filmojnë dhe shpërndajnë.
Ka njerëz që kanë aq shumë ligësi në zemër, sa shkatërrojnë jetën e dikujt për pak klikime.
Dua t’ju them hapur: Ata që përdorin teknologjinë për të shkatërruar jetë, po mbjellin një farë aq të helmuar, saqë ky mallkim do të kthehet dhe do të godasë familjet dhe pasardhësit e tyre deri në brezin e tretë dhe të katërt.
Atë që i bën sot jetës së dikujt, po e hap si gropë ku nesër do të bien njerëzit e tu më të dashur.
Gjuetia ndaj njeriut nuk është drejtësi. Është mallkim për ata që e ushtrojnë.
Shoqëria jonë ka nevojë për më pak gurë dhe për më shumë shërim.